रांजणगाव ते उज्जैन: आप्पा पवारांची २५ तासांत सायकल वारी!

रांजणगाव ते उज्जैन: आप्पा पवारांची २५ तासांत सायकल वारी!
शिरूर प्रतिनिधी - रमेश बनसोडे
भांबर्डे येथील आप्पा पवार यांनी अवघ्या २५ तासांमध्ये रांजणगाव गणपती ते उज्जैन महाकालेश्वर सायकल यात्रा पूर्ण करून एक विक्रम प्रस्थापित केला आहे. २१ फेब्रुवारी २०२५ रोजी पहाटे ५ वाजता मळगंगा मातेचे आणि पुजारी पवार यांचे दर्शन घेऊन त्यांनी या यात्रेला सुरुवात केली. उद्योजक नितीनशेठ दौंडकर, हॉटेल जगदंबाचे शिवाजीराव बोराडे पाटील, मार्गदर्शक सचिनशेठ हरगुडे पाटील आणि कारेगावचे सरपंच शहाजीराव तळेकर यांच्या आशीर्वादाने त्यांनी रांजणगाव गणपती मंदिरात नारळ फोडून सकाळी ७:३० वाजता सायकल यात्रेला सुरुवात केली.
या मोहिमेत त्यांना शिवाजीराव बोराडे आणि शहाजी तळेकर यांनी शिरूरपर्यंत साथ दिली. शिरूर, सुपा, केडगाव, राहुरी, शिर्डी, मनमाडमार्गे आप्पा पवार यांनी प्रवास केला. मनमाड येथे बाबासाहेब पवार यांनी त्यांच्या मुक्कामाची सोय केली. दुसऱ्या दिवशी, २२ फेब्रुवारी रोजी पहाटे ४:४५ वाजता उठून त्यांनी सकाळी ७:२० वाजता उज्जैनच्या दिशेने प्रवास सुरू केला. मालेगाव, धुळे, शिरपूर, सेंधवा मार्गे त्यांनी रात्री १० वाजेपर्यंत २०० किलोमीटरचे अंतर पूर्ण केले आणि महाकालेश्वराचे दर्शन घेतले.
या संपूर्ण यात्रेत आप्पा पवार यांनी पहिल्या दिवशी १० तास आणि दुसऱ्या दिवशी १५ तास सायकल चालवली. या २५ तासांच्या विक्रमी सायकल वारीने त्यांनी सर्वांनाच आश्चर्याचा धक्का दिला आहे.
२५ तासांत रांजणगाव ते उज्जैन सायकल यात्रा पूर्ण
भांबर्डे येथील आप्पा पवार यांचा विक्रम
उद्योजक आणि गावकऱ्यांचे प्रोत्साहन
मनमाड येथे मुक्कामाची सोय
महाकालेश्वराचे दर्शन घेऊन यात्रेची सांगता