अहिल्यानगर जिल्ह्यातील रहिवाशी मुंबई पोलिस दलातील आयपीएस अधिकारी डॉ. सुधाकर पठारे यांचे अपघाती निधन

अहिल्यानगर: मुंबई पोलिस दलातील आयपीएस अधिकारी डॉ. सुधाकर पठारेंचे अपघाती निधन झाले आहे. देवदर्शनासाठी श्रीशैलम येथेून नागरकुरलूनकडे जात असताना त्यांच्या कारचा भीषण अपघात झाला त्यात त्यांचा जागीच मृत्यू झाला. कारची ट्रकसोबत धडक झाली आणि हा भीषण अपघात झाला. पठारे हे सध्या मुंबई पोलिस दलात पोर्ट झोनचे पोलिस उपायुक्त म्हणून कार्यरत होते. सुधाकर पठारे यांच्या अपघाती निधनामुळे महाराष्ट्र पोलिस दलावर शोककळा पसरली आहे. सुधाकर पठारे हे ट्रेनिंगसाठी हैद्राबादला गेले होते. तेथून ज्योतिर्लिंगाच्या दर्शनासाठी जात असताना हा अपघात झाला. त्यांच्यासोबत असलेल्या नातेवाईकाचाही यात मृ्त्यू झाला आहे. तेलंगणा पोलिसांनी या घटनेची माहिती मुंबई पोलिसांना कळवली आहे. पठारे हे २०११ च्या बॅचचे आयपीएस अधिकारी होते. पोलिस दलात विविध पदांची जबाबदारी त्यांनी सांभाळली होती. अधिकारी म्हणून कार्यरत असताना अनेक शहरात अधिकारी म्हणून आपली छाप पाडली होती. आयपीएस डॉ. सुधाकर पठारे हे अहिल्यानगरमधील पारनेर तालुक्यातील वाळवणेचे रहिवासी होते. त्यांनी एम. एस्सी.अग्री, एलएलबी केले होते. शासनाच्या अनेक खात्यांमध्ये ते अधिकारी राहिले होते. स्पर्धा परीक्षेद्वारे ते १९९५ मध्ये जिल्हा विशेष लेखा परीक्षक झाले तर १९९६ मध्ये विक्रीकर अधिकारी १ म्हणून कार्यरत होते. पोलिस खात्यात ते १९९८ मध्ये पोलिस उपअधीक्षक म्हणून कार्यरत झाले. त्यांनी उपअधीक्षक म्हणून कोल्हापूर शहर, पंढरपूर, अकलूज इत्यादी ठिकाणी सेवा बजावली. चंद्रपूरचे ते अप्पर पोलिस अधीक्षक होते. तर वसई, साताऱ्यात त्यांनी पोलिस अधीक्षक होते. सीआयडी अमरावती येते पोलिस अधीक्षक होते. पोलिस उपायुक्त म्हणून त्यांनी राज्यातील प्रमुख शहरांमध्ये सेवा बजावली आहे. त्यात मुंबई, नवी मुंबई, पुणे, ठाणे इत्यादी शहरांचा समावेश आहे. पठारे यांनी संघटित गुन्हेगारीविरोधात मोक्का, तडीपारी अशा प्रतिबंधात्मक कारवाई केल्या होत्या. कायदा सुव्यवस्थेसाठी त्यांनी अनेक उपक्रम राबवले होते. त्यांच्या निधनामुळे राज्याच्या पोलिस दलावर शोककळा पसरली आहे. पोलिस दलातील एक कर्तव्यनिष्ठ अधिकारी गमावल्याची भावना व्यक्त होत आहे.