મુખ્યમંત્રી શ્રી ભૂપેન્દ્રભાઈ પટેલે માનનીય વડાપ્રધાન શ્રી નરેન્દ્રભાઈ મોદીની પ્રેરણા અને માર્ગદર્શનથી વર્લ્ડ કલાસ ઇન્ફ્ર

મુખ્યમંત્રી શ્રી ભૂપેન્દ્રભાઈ પટેલે માનનીય વડાપ્રધાન શ્રી નરેન્દ્રભાઈ મોદીની પ્રેરણા અને માર્ગદર્શનથી વર્લ્ડ કલાસ ઇન્ફ્રાસ્ટ્રક્ચર સાથે આકાર પામી રહેલા ધોલેરા SIR અને સ્માર્ટ સિટીના વિવિધ વિકાસ કામોનું આજે સ્થળ નિરીક્ષણ કર્યું હતું તેમજ વિવિધ પ્રોજેક્ટસની પ્રગતિની સમીક્ષા માટે રીવ્યુ બેઠક યોજીને તમામ કામગીરી સમયબદ્ધ અને ગુણવત્તાયુક્ત રીતે પૂર્ણ થાય તે માટે મહત્ત્વપૂર્ણ માર્ગદર્શન આપ્યું હતું.

મુખ્યમંત્રીશ્રી સમક્ષની બેઠકમાં માળખાકીય સુવિધાના અગત્યના પ્રોજેક્ટસ અંગેની વિગતો આપતાં જણાવવામાં આવ્યું હતું કે, અમદાવાદ-ધોલેરા એક્સપ્રેસવેની 95% કામગીરી તથા 300 મેગાવૉટ સોલાર પાર્ક સહિત રોડ-અંડરગ્રાઉન્ડ સુવિધાઓ, પ્લગ એન્ડ પ્લે ઇન્ફ્રાસ્ટ્રક્ચર ફેસિલીટીઝ પૂર્ણ થઈ ગઈ છે. આ ઉપરાંત, ભીમનાથ-ધોલેરા ફ્રેઈટ રેલ્વેલાઈન સહિત હોસ્પિટલ, શાળા, ફાયર સ્ટેશન અને આવાસીય સુવિધાના કામો પ્રગતિમાં છે.

મુખ્યમંત્રીશ્રી સમક્ષ 12 જેટલા વિવિધ પ્રોજેક્ટ ડેવલપર્સે પણ ધોલેરા ખાતેના પોતાના પ્રોજેક્ટસની પ્રગતિ તેમજ બાંધકામ આયોજન સહિતના ભવિષ્યના રોડમેપનું પ્રેઝન્ટેશન કર્યું હતું.

માનનીય વડાપ્રધાન શ્રી નરેન્દ્રભાઈ મોદીના ભારતને સેમિકન્ડક્ટર હબ બનાવવાના વિઝનના ભાગરૂપે ‘સેમિકોન સિટી’ તરીકે વિકસી રહેલ ધોલેરા સ્માર્ટ સિટીમાં રાષ્ટ્રીય-આંતરરાષ્ટ્રીય કક્ષાની સેમિકન્ડક્ટર ઉત્પાદક કંપનીઓ પોતાના યુનિટ્સ સ્થાપી રહી છે. મુખ્યમંત્રીશ્રીએ ટાટા ઇલેક્ટ્રોનિક્સનો જે સેમિકન્ડક્ટર પ્લાન્ટ ધોલેરા સેમિકોન સિટીમાં સ્થાપવામાં આવ્યો છે તેની મુલાકાત લઈને પ્રગતિ અને નિર્માણની સ્થિતીની સમીક્ષા કંપનીના અધિકારીઓ સાથે કરી હતી.

મુખ્યમંત્રીશ્રીએ ધોલેરા સેમિકોન સિટીમાં નિર્માણાધિન હોસ્પિટલ, સ્કુલ, ફાયર સ્ટેશન, રેસીડેન્સિયલ કોમ્પ્લેક્સ, ટેન્ટ સિટી અને ફૂડ કોર્ટ સહિતના સ્થળોની પ્રત્યક્ષ મુલાકાત લીધી હતી. મુખ્યમંત્રીશ્રીની આ સ્થળ મુલાકાતથી ધોલેરા ઓથોરિટી તેમજ તેની SPVના અધિકારીઓ-કર્મચારીઓ તથા વિવિધ પ્રોજેક્ટ ડેવલપર્સને પ્રોત્સાહન અને માર્ગદર્શન મળ્યા હતા.

મુખ્યમંત્રીશ્રીએ તેમની ધોલેરાની મુલાકાત દરમિયાન ધોલેરા ઇન્ટરનેશનલ એરપોર્ટની પણ સ્થળ મુલાકાત લઈને ₹1350 કરોડના અંદાજિત ખર્ચ સાથે નિર્માણ થઈ રહેલા કાર્ગો બિલ્ડીંગ, ટર્મિનલ બિલ્ડીંગ અને રન-વે નિર્માણની કામગીરીની સમીક્ષા કરી હતી.
ન્યૂઝ રિપોર્ટર હરિકૃષ્ણ ભટ્ટ ગુજરાત સુરત ઓલપાડ