जनता विद्यालयात ‘वृक्षबंधन रक्षाबंधन’ कार्यक्रम उत्साहात साजरा

पिंपळगाव सराई (ता. ९ ऑगस्ट) – “आपल्या जीवनाचे खरे रक्षक म्हणजे वृक्ष” हा संदेश देत जनता विद्यालय पिंपळगाव सराई येथे रक्षाबंधन उत्सव आणि क्रांती दिनाचे औचित्य साधून ‘वृक्षबंधन रक्षाबंधन’ हा आगळावेगळा उपक्रम उत्साहात पार पडला. पर्यावरणाचे महत्त्व आणि वृक्षसंवर्धनाची गरज अधोरेखित करण्यासाठी हा कार्यक्रम आयोजित करण्यात आला.

सदर उपक्रमांतर्गत विद्यालयातील विद्यार्थी, शिक्षकवर्ग आणि उपस्थित मान्यवरांनी स्वतः तयार केलेल्या पर्यावरणपूरक राख्या विद्यालय परिसरातील वृक्षांना बांधून त्यांचे रक्षण करण्याची शपथ घेतली. या कृतीतून वृक्ष हे आपल्या अस्तित्वाचे आधारस्तंभ असल्याची जाणीव सर्वांना करून देण्यात आली. विद्यार्थ्यांच्या कल्पकतेतून साकारलेल्या कागद, कापड व नैसर्गिक साहित्यापासून बनविलेल्या राख्यांनी कार्यक्रमाला विशेष आकर्षण प्राप्त झाले.

कार्यक्रमाचे अध्यक्षस्थान प्राचार्य प्रमोद ठोंबरे यांनी भूषविले. प्रमुख उपस्थितीमध्ये पर्यवेक्षक संजय पिवटे व मार्गदर्शक सुहास कुलकर्णी उपस्थित होते. अध्यक्षीय भाषणात प्राचार्य ठोंबरे सरांनी “वृक्षतोड थांबवणे आणि वृक्षारोपण करणे ही आजची अत्यंत महत्त्वाची गरज असून, प्रत्येकाने आपल्या परिसरातील किमान एका वृक्षाची जबाबदारी घ्यावी” असे आवाहन केले.

पर्यवेक्षक संजय पिवटे सरांनी विद्यार्थ्यांचे कौतुक करताना, “आपण बांधलेली ही राखी ही फक्त धागा नसून ती आपल्या व वृक्षांमधील संरक्षणाची आणि स्नेहाची डोरी आहे” असे सांगितले. मार्गदर्शक सुहास कुलकर्णी यांनी वृक्षांमुळे मिळणाऱ्या ऑक्सिजन, सावली, पाणीचक्रातील भूमिका याबद्दल विद्यार्थ्यांना माहिती दिली.

विद्यार्थ्यांच्या उत्स्फूर्त सहभागामुळे कार्यक्रम वातावरणात उत्साह, आनंद आणि पर्यावरणाबद्दलची नवी प्रेरणा पसरवून गेला. कार्यक्रमाच्या यशस्वी आयोजनासाठी सर्व शिक्षक, विद्यार्थी व सहाय्यक कर्मचाऱ्यांनी सहकार्य केले.