मुंबई-गोवा महामार्गावर खड्ड्यांचे साम्राज्य; गणेशोत्सवापूर्वी तातडीने दुरुस्तीची मागणी

कोकणवासियांचा सर्वात मोठा सोहळा म्हणजे गणेशोत्सव. दरवर्षी मुंबई, पुणे तसेच देशभरातून लाखो भाविक कोकणात आपल्या बाप्पाच्या दर्शनासाठी येतात. मात्र यावर्षी पुन्हा एकदा मुंबई-गोवा महामार्गावरील खड्ड्यांचे साम्राज्य भाविकांच्या सुरक्षेचा गंभीर प्रश्न निर्माण करत आहे.

पावसाळ्यामुळे महामार्गावर मोठमोठे खड्डे पडले असून रस्त्याची अवस्था अतिशय दयनीय झाली आहे. रत्नागिरी, सिंधुदुर्ग, रायगड, ठाणे या जिल्ह्यांतील अनेक ठिकाणी खड्डे एवढ्या प्रमाणात आहेत की वाहनांची गती थांबवावी लागते. यामुळे वाहतूक कोंडी, अपघातांचा धोका आणि प्रवासातील त्रास वाढला आहे. रात्रीच्या वेळी या खड्ड्यांची कल्पना न आल्याने प्रवाशांचे हाल अधिकच होतात.

गणपती काळात कोकणात जाणाऱ्या वाहनांची संख्या प्रचंड वाढते. भाविकांना सुरक्षित व सुरळीत प्रवास व्हावा यासाठी गणेशोत्सवापूर्वी महामार्गाची तातडीने दुरुस्ती करण्याची मागणी जोर धरत आहे. स्थानिक नागरिक, सामाजिक संघटना तसेच कोकण प्रवासी मंडळांनी शासन आणि राष्ट्रीय महामार्ग प्राधिकरणाकडे वारंवार पत्रव्यवहार केला आहे.

गेल्या काही वर्षांपासून महामार्गाचे काम रखडलेले असून, दरवर्षी केवळ आश्वासने दिली जातात. "गणपतीसाठी येणाऱ्या कोकणकरांचा जीव धोक्यात घालून प्रवास करण्याची वेळ का यावी?" असा संतप्त प्रश्न जनतेतून विचारला जात आहे.