ലക്ഷദ്വീപിൽ ട്യൂണ, കടൽപായൽ, അലങ്കാര മത്സ്യ വ്യവസായങ്ങൾക്ക് നവംബർ മാസത്തിൽ ഇൻവെസ്റ്റേഴ്സ് മീറ്റ്; മത്സ്യബന്ധന മേഖലയ്ക്ക് നേട്ടങ്ങളും വെല്ലുവിളികളും.

കവരത്തി: ലക്ഷദ്വീപിലെ മത്സ്യബന്ധന വ്യവസായത്തിന് പുതിയ വളർച്ചാ സാധ്യതകൾ തുറന്ന് കൊടുക്കാൻ കേന്ദ്ര സർക്കാർ നവംബർ മാസത്തിൽ ഇൻവെസ്റ്റേഴ്സും എക്സ്പോർട്ടേഴ്സും പങ്കെടുക്കുന്ന പ്രത്യേക മീറ്റ് സംഘടിപ്പിക്കുമെന്ന് കേന്ദ്ര മത്സ്യബന്ധന മന്ത്രി രാജീവ് രഞ്ജൻ സിംഗ് അറിയിച്ചു. ട്യൂണ മത്സ്യബന്ധനം, കടൽപായൽ കൃഷി, അലങ്കാര മത്സ്യ വിപണി തുടങ്ങിയ മേഖലകളിൽ നിക്ഷേപം ആകർഷിച്ച് ലക്ഷദ്വീപിന്റെ മത്സ്യബന്ധന വ്യവസായത്തെ അന്താരാഷ്ട്ര തലത്തിലേക്ക് ഉയർത്തുകയെന്നതാണ് മീറ്റിന്റെ ലക്ഷ്യം.

ലക്ഷദ്വീപ് ഇന്ത്യയുടെ ഏകദേശം 20% എക്സ്ക്ലൂസീവ് ഇക്കണോമിക് സോൺ ഉൾക്കൊള്ളുന്ന പ്രദേശമാണെന്ന് മന്ത്രി പറഞ്ഞു. ആഗോളതലത്തിൽ അംഗീകാരം നേടിയ പോൾ-ആൻഡ്-ലൈൻ, ഹാൻഡ്‌ലൈൻ രീതിയിലുള്ള പരിസ്ഥിതി സൗഹൃദ മത്സ്യബന്ധനത്തിന് സർക്കാർ കൂടുതൽ പിന്തുണ നൽകുമെന്നും അദ്ദേഹം വ്യക്തമാക്കി.

സാദ്ധ്യതകളും നേട്ടങ്ങളും
• സാമ്പത്തിക വളർച്ച: ട്യൂണ മത്സ്യത്തിന്റെ പിടിത്തവും കയറ്റുമതിയും വർധിപ്പിക്കുന്നത് ദ്വീപിലെ സമ്പദ്‌വ്യവസ്ഥ ശക്തിപ്പെടുത്തുകയും തൊഴിൽ അവസരങ്ങൾ വർധിപ്പിക്കുകയും ചെയ്യും.
• കടൽപായൽ കൃഷി: കടൽപായലിന്റെ അന്താരാഷ്ട്ര വിപണി വേഗത്തിൽ വളരുന്നു. ലക്ഷദ്വീപിൽ ഇതിന് മികച്ച സാഹചര്യമുള്ളതിനാൽ, യുവാക്കൾക്ക് പുതിയ സംരംഭക സാധ്യതകൾ സൃഷ്ടിക്കും.
• അലങ്കാര മത്സ്യങ്ങൾ: ആഭ്യന്തരവും അന്താരാഷ്ട്രവുമായ വിപണിയിൽ ഡിമാൻഡ് ഉയർന്നതിനാൽ, ദ്വീപുകാർക്ക് അധിക വരുമാന മാർഗം തുറക്കും.
• ഇൻഫ്രാസ്ട്രക്ചർ വികസനം: കൂൾഡ് ചെയിൻ, മൂല്യവർദ്ധിത പ്രോസസ്സിംഗ് യൂണിറ്റുകൾ തുടങ്ങിയവ സ്ഥാപിക്കുന്നത് മത്സ്യത്തിന്റെ നഷ്ടം കുറയ്ക്കുകയും ഉൽപ്പന്ന ഗുണമേന്മ ഉയർത്തുകയും ചെയ്യും.

വെല്ലുവിളികളും ആശങ്കകളും
• പരിസ്ഥിതി ഭീഷണി: മത്സ്യബന്ധനവും കടൽപായൽ കൃഷിയും നിയന്ത്രണം നഷ്ടപ്പെടുകയാണെങ്കിൽ, കടൽ പരിസ്ഥിതി സമതുലനം തകരാൻ സാധ്യതയുണ്ട്.
• പാരമ്പര്യ മത്സ്യതൊഴിലാളികൾക്ക് സമ്മർദ്ദം: വലിയ കമ്പനികൾ വരുമ്പോൾ ചെറുകിട മത്സ്യതൊഴിലാളികൾക്ക് മത്സരിക്കാൻ പ്രയാസമുണ്ടാകും.
• പരിശീലന ആവശ്യകത: ആധുനിക വഞ്ചി സാങ്കേതിക വിദ്യയും പ്രോസസ്സിംഗ് രീതികളും പഠിക്കാതെ മത്സ്യതൊഴിലാളികൾക്ക് മാറ്റങ്ങളോട് പൊരുത്തപ്പെടാൻ ബുദ്ധിമുട്ടുണ്ടാകും.
• വിപണി ആശ്രിതത്വം: കയറ്റുമതിയിലേക്കുള്ള അമിതമായ ആശ്രയത്വം ഉണ്ടാകുന്നത് വിപണി വിലയിലെ മാറ്റങ്ങൾ നേരിട്ട് മത്സ്യതൊഴിലാളികളെ ബാധിക്കാനുള്ള സാധ്യത വർധിപ്പിക്കുന്നു.

കേന്ദ്ര–ലക്ഷദ്വീപ് ഭരണകൂട സംയുക്ത പ്രവർത്തനസംഘം രൂപീകരിച്ച് പദ്ധതി വേഗത്തിൽ നടപ്പാക്കുമെന്ന് അധികൃതർ അറിയിച്ചു. ‘വികസിത ഭാരത് 2047’ ദർശനവുമായി ബന്ധിപ്പിച്ചുള്ള ഈ സംരംഭം ലക്ഷദ്വീപ് മത്സ്യതൊഴിലാളികൾക്ക് പുതിയ സാമ്പത്തിക വഴികൾ തുറന്ന് കൊടുക്കുമ്പോഴും മത്സത്തൊഴിലാളികളുടെ അവകാശങ്ങൾ നിലനിർത്തിയും, പ്രാദേശിക വികാരങ്ങളെ കണക്കിലെടുത്തുകൊണ്ടാവണം നടപ്പിൽ വരുത്താൻ.

മത്സത്തൊഴിലാളികൾ ഇപ്പോൾത്തന്നെ ഇതിനുവേണ്ടി ഉണർന്നു പ്രവർത്തിക്കണം.