સુરતમાં પાવરલિફ્ટિંગ ચેમ્પિયનશિપનો ધમાકેદાર પ્રારંભ

સુરત, 21 સપ્ટેમ્બર:
ગુજરાત પાવરલિફ્ટિંગ એસોસિએશન દ્વારા સુરતના રૂસ્તમપુરા કોમ્યુનિટી હોલ ખાતે ગુજરાત સ્ટેટ અન-ઇક્વિપ્ડ મેન એન્ડ વુમન સબ-જૂનિયર, જુનિયર, સિનિયર અને માસ્ટર્સ પાવરલિફ્ટિંગ, બેન્ચપ્રેસ અને ડેડલિફ્ટ ચેમ્પિયનશિપ 2025 નો ભવ્ય પ્રારંભ થયો.

રાજ્યના ગૃહ રાજ્ય મંત્રી હર્ષ સંઘવી મુખ્ય અતિથિ તરીકે ઉપસ્થિત રહ્યા. તેમણે ખેલાડીઓને પ્રોત્સાહિત કરતા કહ્યું, “આવી સ્પર્ધાઓ યુવાનોમાં શિસ્ત, આત્મવિશ્વાસ અને સંકલ્પશક્તિ વિકસાવે છે. ગુજરાતના ખેલાડીઓ રાષ્ટ્રીય અને આંતરરાષ્ટ્રીય સ્તરે નામ મેળવવા સક્ષમ છે.”

ચેમ્પિયનશિપમાં રાજ્યભરના અનેક ખેલાડીઓએ જુસ્સાભેર ભાગ લીધો. ખાસ કરીને વાડિયા વુમન કૉલેજની સોલંકી તેજલએ સિનિયર કેટેગરીના 57 કેજી વર્ગમાં 70 કેજી ડેડલિફ્ટ કરીને બીજું સ્થાન મેળવ્યું. તેમનું પ્રદર્શન માત્ર રમતિયાળ સિદ્ધિ જ નહીં, પરંતુ મહિલાઓની શક્તિ અને દૃઢતાનું જીવંત પ્રતિક બની રહ્યું છે.

ચેમ્પિયનશિપમાં મહિલાઓના ઉત્કૃષ્ટ પ્રદર્શનથી સ્પષ્ટ થયું કે રમતગમત હવે માત્ર પુરુષો સુધી મર્યાદિત નથી. યુવતીઓ પણ સમાન દમખમથી મેદાનમાં ઉતરી રહી છે અને પોતાના પરાક્રમથી સમાજમાં સશક્તિકરણનો મેસેજ આપી રહી છે.

આયોજકોનું માનવું છે કે આવી સ્પર્ધાઓ રાજ્યમાં રમતગમતની સંસ્કૃતિને મજબૂત બનાવે છે અને યુવા ખેલાડીઓને આગળ વધવા માટે મહત્વપૂર્ણ મંચ પૂરૂં પાડે છે. આગામી દિવસોમાં વિવિધ વજન શ્રેણી મુજબની સ્પર્ધાઓ યોજાશે અને શ્રેષ્ઠ ખેલાડીઓને પુરસ્કૃત કરવામાં આવશે.