“नगरपरिषद कर वसूल करते, पण जमीन वनक्षेत्रात! हा न्याय आहे का?”

देवळी, दि. 22 सप्टेंबर 2025

देवळी शहरातील प्रभाग क्रमांक 8, वार्ड नंबर 16, मीरंनाथ मंदिर मागील सर्वे नंबर 961 येथील नागरिकांच्या हक्कासाठी समाजसेवक तथा माजी नगराध्यक्ष जब्बार तवर यांच्या नेतृत्वाखाली आज नगरपरिषद मुख्याधिकारी व तहसीलदार देवळी यांना निवेदन सादर करण्यात आले.

नगरपरिषदेकडून सांगण्यात आले की – 2023 पर्यंत सदर जागा कुरण क्षेत्रात होती; मात्र 2023 पासून ती वनक्षेत्रात दाखल झाली आहे. परंतु फेरफार नेमका कधी, कसा आणि कोणाच्या आदेशाने झाला हे प्रशासन स्पष्ट करू शकले नाही.

नागरिकांचा थेट सवाल – जर 2010-11 मध्ये या जागेवर घरकुलाची निर्मिती झाली आणि 2023 पर्यंत ती जागा कुरण क्षेत्रात होती, तर अचानक ती वनक्षेत्रात कशी दाखल झाली? आणि जर वनक्षेत्रातच असेल, तर आजतागायत नगरपरिषद कर वसूल कसा करते? हे कायद्याला धरून आहे का?

तहसीलदार देवळी यांनीही मान्य केले की सदर जागा खरोखर वनविभागात आहे की कुरण क्षेत्रात, याची त्यांनाही खात्री नाही. एवढ्या गंभीर प्रश्नावर स्थानिक प्रशासन हात झटकते, हे सर्वसामान्य नागरिकांच्या गळ्यात न बसणारे आहे.

यामध्ये राजकीय हस्तक्षेप झाला की कुण्या प्रशासकीय अधिकाऱ्याचा दबाव होता? हा फेरफार कोणाच्या फायद्यासाठी झाला? हा प्रश्न आज नागरिकांमध्ये चर्चेचा मुख्य विषय ठरला.

निवेदनावेळी माजी नगराध्यक्ष जब्बार तवर, समाजसेवक शंकर केवदे, किरण बोंडे, विष्णू तडसे, संतोष शिवरकर, निलेश महाजन, गजानन निकुरे, धनराज निंभोरे, तसेच मोठ्या संख्येने नागरिक उपस्थित होते.

नागरिकांचा इशारा – या विषयावर अधिकृत कागदपत्रांसहित पारदर्शक उत्तर मिळालेच पाहिजे; अन्यथा न्याय मिळवण्यासाठी पुढील तीव्र आंदोलनाचा मार्ग अवलंबावा लागेल.