ബേപ്പൂർ തുറമുഖ സർവീസ് ചാർജ് വർധന: പുനപരിശോധിക്കാൻ ലക്ഷദ്വീപ് എം.പി. ആവശ്യപ്പെട്ടു.

കോഴിക്കോട്: ബേപ്പൂർ തുറമുഖത്തിലെ സർവീസ് ചാർജുകൾ കൂട്ടിയ തീരുമാനത്തെ പുനഃപരിശോധിക്കണമെന്ന് ലക്ഷദ്വീപ് എം.പി. മുഹമ്മദ് ഹംദുള്ള സയ്യിദ് ആവശ്യപ്പെട്ടു. ലക്ഷദ്വീപിൽ നിന്ന് വരുന്ന കപ്പലുകൾ കൂടുതലും ആശ്രയിക്കുന്ന തുറമുഖമായതിനാൽ, വർധനവുകൾ നേരിട്ട് ദ്വീപുകാരുടെ ഗതാഗതത്തെയും ചരക്ക് ഗതാഗതത്തെയും ബാധിക്കുമെന്നാണ് എം.പി. മുന്നറിയിപ്പ് നൽകിയത്.

തുറമുഖ കാര്യ മന്ത്രിയായ വി.എൻ. വാസവന് അയച്ച കത്തിലൂടെയാണ് സയ്യിദ് ആവശ്യവുമായി മുന്നോട്ട് വന്നത്. ചരക്കുകൾ കപ്പലുകളിൽ കയറ്റുന്നതിനുള്ള ക്രെയിൻ ചാർജ് മൂന്നു മടങ്ങായി കൂട്ടിയതും, കപ്പലുകൾ തുറമുഖത്ത് പ്രവേശിക്കുന്നതിനുള്ള ഫീസും ഇരട്ടിയാക്കിയതും എം.പി. ഗുരുതരമായി ചൂണ്ടിക്കാട്ടി. കൂടാതെ, കപ്പലുകളെ തുറമുഖത്തേക്ക് വലിച്ചുകൊണ്ടുപോകുന്ന ടഗ് സർവീസുകൾക്കും, ഗോഡൗൺ സൗകര്യങ്ങൾക്കും കുടിവെള്ളത്തിനും നിരക്കുകൾ കൂട്ടിയിട്ടുണ്ട്.

“ബേപ്പൂരിൽ നിന്ന് ലക്ഷദ്വീപിലേക്ക് പോകുന്ന യാത്രക്കാരൻ കപ്പൽ സർവീസുകൾ ഇതിനകം തന്നെ റദ്ദാക്കിയ സാഹചര്യത്തിലാണ് പുതിയ നിരക്കുകൾ നടപ്പിലാക്കിയിരിക്കുന്നത്. ഇതിലൂടെ ദ്വീപുകാരുടെ ആശ്രയം കൂടുതലുള്ള ചരക്ക് സർവീസുകൾക്കും ഗുരുതര തിരിച്ചടിയാകും. യാത്രാസർവീസ് പുനഃസ്ഥാപിക്കാനുള്ള എന്റെ ശ്രമങ്ങൾക്കും തടസ്സമാകുമെന്ന ഭയം ഉണ്ട്,” എന്നാണ് എം.പി. കത്തിൽ വ്യക്തമാക്കിയത്.

ലക്ഷദ്വീപ് ദ്വീപുകാർക്കായി ചരിത്രപരമായും സാമ്പത്തികമായും ഏറ്റവും പ്രധാനപ്പെട്ട തുറമുഖമാണ് ബേപ്പൂർ. കൊച്ചി, മംഗലാപുരം എന്നിവിടങ്ങളേക്കാൾ അടുത്തും കുറഞ്ഞ ചിലവിലുമാണ് ഇവിടെ നിന്ന് യാത്രയും ചരക്കു ഗതാഗതവും സാധാരണയായി നടന്നുവരുന്നത്. എന്നാൽ പുതിയ സർവീസ് ചാർജ് വർധനവുകൾ ദ്വീപുകാരുടെ ജീവിതച്ചെലവുകൾ കൂടി ഉയർത്തുമെന്ന ആശങ്കയും സയ്യിദ് രേഖപ്പെടുത്തി.

തുറമുഖ സേവനങ്ങളിൽ മാന്യമായ നിരക്കുകൾ ഉറപ്പാക്കേണ്ടത് സർക്കാർ ബാധ്യതയായതിനാൽ, തീരുമാനം പരിഗണിക്കണമെന്ന് അദ്ദേഹം മന്ത്രിയോട് ആവശ്യപ്പെട്ടു.