✨ ತಾಳಿಕೋಟಿಯಲ್ಲಿ ವಿಜಯದಶಮಿ ಬನ್ನಿ ಮುಡಿಯೋ ಸಂಭ್ರಮ

ಹೇಮರೆಡ್ಡಿ ಮಲ್ಲಮ್ಮ ತಾಯಿಯ ದೇವಸ್ಥಾನದಲ್ಲಿ ಸರ್ವ ಸಮಾಜದ ತಾಯಂದಿರ ಭಾಗವಹಿಸಿ ಸಂಪ್ರದಾಯ ಉಳಿಸಿ ಕೊಂಡು ಬಂದರು

ತಾಳಿಕೋಟಿ:
ತಾಳಿಕೋಟಿ ಪಟ್ಟಣದ ಸಾದ್ವಿ ಶಿರೋಮಣಿ ಶಿವಶರಣೆ ಶ್ರೀ ಹೇಮರೆಡ್ಡಿ ಮಲ್ಲಮ್ಮ ತಾಯಿಯ ದೇವಸ್ಥಾನದಲ್ಲಿ ವಿಜಯದಶಮಿ ಹಬ್ಬದ ಅಂಗವಾಗಿ ನಡೆದ ಬನ್ನಿ ಮುಡಿಯೋ ಕಾರ್ಯಕ್ರಮ ಭಕ್ತಿ, ಸಂಪ್ರದಾಯ ಮತ್ತು ಬಾಂಧವ್ಯದ ಮಿಳಿತವಾಗಿ ಶ್ರದ್ಧಾಭಕ್ತಿಯಿಂದ ನೆರವೇರಿತು.

ಕಾರ್ಯಕ್ರಮದಲ್ಲಿ ಪಟ್ಟಣದ ಸರ್ವ ಸಮಾಜದ ತಾಯಂದಿರು ಹಾಗೂ ಹಿರಿಯರು ಧಾರ್ಮಿಕ ಶ್ರದ್ಧೆ ತೋರಿ, ದೇವಿಯ ಆಶೀರ್ವಾದವನ್ನು ಪಡೆಯಲು ತಾಯಿಯ ದೇವಾಲಯಕ್ಕೆ ಆಗಮಿಸಿದರು. ಬನ್ನಿ ಮುಡಿಯೋ ಕಾರ್ಯಕ್ರಮವನ್ನು ಪರಸ್ಪರ ವಿಶ್ವಾಸ ಮತ್ತು ಬಾಂಧವ್ಯ ಹೆಚ್ಚಿಸುವ ಪರಂಪರೆಯ ಸಂಕೇತವಾಗಿ ಆಚರಿಸಲಾಯಿತು.

ವಿಜಯದಶಮಿ ಹಬ್ಬವು ಪೌರಾಣಿಕ ಕತೆಯ ಪ್ರಕಾರ ಸತ್ಯದ ವಿಜಯ ಹಾಗೂ ಅಸತ್ಯದ ಸೋಲಿನ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಈ ಹಬ್ಬದ ದಿನ ಬನ್ನಿ ಮರದ ಎಲೆಗಳನ್ನು ವಿನಿಮಯ ಮಾಡಿಕೊಳ್ಳುವುದು ಹಳೆಯ ಸಂಪ್ರದಾಯ. ಬನ್ನಿ ಎಲೆಗಳನ್ನು ಸೌಭಾಗ್ಯ, ಐಶ್ವರ್ಯ ಮತ್ತು ವಿಜಯದ ಪ್ರತೀಕವಾಗಿ ಪರಿಗಣಿಸಿ ಪರಸ್ಪರ ವಿನಿಮಯ ಮಾಡುವುದರಿಂದ ಧನ, ಧಾನ್ಯ ಮತ್ತು ಸಮೃದ್ಧಿ ದೊರೆಯುತ್ತದೆ ಎಂಬ ಜನನಂಬಿಕೆ ಇದೆ.

ಈ ಹಿನ್ನೆಲೆಯಲ್ಲಿ ತಾಯಂದಿರು ಭೇದಭಾವವಿಲ್ಲದೆ, ಒಗ್ಗಟ್ಟಿನಿಂದ ಬನ್ನಿ ವಿನಿಮಯ ಮಾಡಿಕೊಂಡು, ತಾಯಿ ಚಾಮುಂಡೇಶ್ವರಿ ಹಾಗೂ ಹೇಮರೆಡ್ಡಿ ಮಲ್ಲಮ್ಮ ತಾಯಿಯ ಆಶೀರ್ವಾದ ಪಡೆದು ಪುನೀತರಾದರು. ಈ ಮೂಲಕ ಪರಸ್ಪರದ ಬಾಂಧವ್ಯವನ್ನು ಗಾಢಗೊಳಿಸುವ ಜೊತೆಗೆ ಸಮಾಜದಲ್ಲಿ ಸಮಾನತೆ ಮತ್ತು ಸೌಹಾರ್ದತೆಯ ಸಂದೇಶವನ್ನೂ ನೀಡಿದರು.

ಈ ಸಂದರ್ಭದಲ್ಲಿ ರೆಡ್ಡಿ ಸಮಾಜದ ಮುಖಂಡರ ಜೊತೆ ಶರಣೆಯಾದ ಶಾಂತಮ್ಮ ತಾಯಿ ಕೋಳೂರು, ಶ್ರೀಮತಿ ದ್ರಾಕ್ಷಾಯಿಣಿ ಹಿಪ್ಪರಗಿ, ಶ್ರೀಮತಿ ಸುನಂದ ಪಾಟೀಲ್, ಶ್ರೀಮತಿ ಸುಮಂಗಲ ಕೋಳೂರು, ಶ್ರೀಮತಿ ವಿಜಯಲಕ್ಷ್ಮಿ ಕೇಸರಬಾವಿ, ಶ್ರೀಮತಿ ಗೌರಮ್ಮ ಪಾಟೀಲ್, ಶ್ರೀಮತಿ ರಾಜೇಶ್ವರಿ ಪಾಟೀಲ್, ಶ್ರೀಮತಿ ಕಮಲಮ್ಮ ಪ್ಯಾಟಿ, ಶ್ರೀಮತಿ ಶೈಲಜಾ ವಡವಡಗಿ, ಶ್ರೀಮತಿ ಶಾಂತ ಕಂಚಲಗಾವಿ, ಶ್ರೀಮತಿ ನಿರ್ಮಲ ದೇಸಾಯಿ ಸೇರಿದಂತೆ ಅನೇಕ ತಾಯಂದಿರು ಭಾಗವಹಿಸಿ ಬನ್ನಿ ವಿನಿಮಯ ಮಾಡಿಕೊಂಡರು.

ಭಾಗವಹಿಸಿದ ತಾಯಂದಿರು ಹಾಗೂ ಮಹಿಳೆಯರು “ಈ ಸಂಪ್ರದಾಯವು ಕೇವಲ ಧಾರ್ಮಿಕ ಆಚರಣೆಯಲ್ಲ, ಇದು ಪರಸ್ಪರ ಸ್ನೇಹ, ಬಾಂಧವ್ಯ ಮತ್ತು ಸಮಾಜದ ಒಗ್ಗಟ್ಟಿಗೆ ಪ್ರತೀಕ” ಎಂದು ಅಭಿಪ್ರಾಯಪಟ್ಟರು.

📌 ವರದಿ: ಸಂಗನಗೌಡ ಗಬಸಾವಳಗಿ, , ತಾಳಿಕೋಟಿ