रांजणगाव एमआयडीसीतील कामगारांचे वेतन थांबले; शिवकृपा कॉन्ट्रॅक्टवर कामगारांचा आरोप

रांजणगाव (प्रतिनिधी):
रांजणगाव एमआयडीसी येथील एका नामांकित कंपनीत शिवकृपा कॉन्ट्रॅक्ट या ठेकेदारामार्फत काम करणाऱ्या कामगारांचे वेतन थांबवण्यात आले असून, याबाबत कामगारांनी तीव्र नाराजी व्यक्त केली आहे. कामगारांच्या म्हणण्यानुसार, ठेकेदाराकडे कोणतेही अधिकृत अधिकार नसतानाही त्यांनी कामगारांचे मेहनतीचे पेमेंट जाणूनबुजून दाबून ठेवले आहे.

दिवाळी सण जवळ येत असताना देखील कामगारांना त्यांच्या हक्काचे पैसे न मिळाल्याने त्यांच्या कुटुंबीयांवर आर्थिक संकट कोसळले आहे. “आम्ही नियमितपणे काम केले असूनही आमचे महिन्याचे वेतन थांबवण्यात आले आहे. ठेकेदाराकडून वारंवार आश्वासन दिले जात असले तरी प्रत्यक्षात काहीच मिळत नाही,” असे काही कामगारांनी सांगितले.

या प्रकरणाची चौकशी करून कामगारांना तात्काळ त्यांचे थकित वेतन देण्यात यावे, अशी मागणी कामगारांनी संबंधित कंपनी व्यवस्थापन व कामगार विभागाकडे केली आहे.

कामगार संघटनांनी देखील या प्रकरणाची गंभीर दखल घेत शिवकृपा कॉन्ट्रॅक्टविरुद्ध योग्य ती कायदेशीर कारवाई करण्याची मागणी केली आहे. प्रशासनाने या प्रकरणात तातडीने लक्ष घालावे, अशी सर्वसामान्य कामगारांमधून मागणी होत आहे.