ਸਰਕਾਰੀ ਸਕੂਲਾਂ ਦੀਆਂ 10ਵੀਂ ਜਮਾਤ ਦੀਆਂ ਵਿਦਿਆਰਥਣਾਂ ਦਾ ਹੋਵੇਗਾ ‘ਸਾਈਕੋਮੈਟ੍ਰਿਕ ਟੈਸਟ’ — ਡੀ.ਈ.ਓ. ਸਤਿਨਾਮ ਸਿੰਘ ਬਾਠ
21 ਨਵੰਬਰ ਨੂੰ ਸਬੰਧਤ ਏਜੰਸੀਆਂ ਦੀ ਮੀਟਿੰਗ ਸੱਦੀ ਗਈ
ਤਰਨਤਾਰਨ, 26 ਨਵੰਬਰ (ਡਾਕਟਰ ਬੁੱਗਾ) — ਸਿੱਖਿਆ ਵਿਭਾਗ ਵੱਲੋਂ ਵਿਦਿਆਰਥੀਆਂ ਦੇ ਹੁਨਰ, ਰੁਚੀਆਂ ਅਤੇ ਮਨੋਵਿਗਿਆਨਕ ਸਮਰੱਥਾ ਦੀ ਪਰਖ ਕਰਦੇ ਹੋਏ ਸਰਕਾਰੀ ਸਕੂਲਾਂ ਵਿੱਚ ਇੱਕ ਮਹੱਤਵਪੂਰਨ ਪਹਲ ਸ਼ੁਰੂ ਕੀਤੀ ਜਾ ਰਹੀ ਹੈ। ਸੈਸ਼ਨ 2025–26 ਦੌਰਾਨ ਤਰਨਤਾਰਨ ਜ਼ਿਲ੍ਹੇ ਦੀਆਂ ਸਰਕਾਰੀ ਸਕੂਲਾਂ ਵਿੱਚ ਪੜ੍ਹ ਰਹੀਆਂ ਦਸਵੀਂ ਜਮਾਤ ਦੀਆਂ ਸਾਰੀਆਂ ਵਿਦਿਆਰਥਣਾਂ ਦਾ ਸਾਈਕੋਮੈਟ੍ਰਿਕ ਟੈਸਟ ਕਰਵਾਇਆ ਜਾਵੇਗਾ।
ਇਸ ਪ੍ਰੋਜੈਕਟ ਦੀ ਤਿਆਰੀ ਅਤੇ ਸੁਚਾਰੂ ਲਾਗੂ ਕਰਨ ਲਈ ਅੱਜ ਜ਼ਿਲ੍ਹਾ ਸਿੱਖਿਆ ਅਫ਼ਸਰ (ਸੈਕੰਡਰੀ) ਸ. ਸਤਿਨਾਮ ਸਿੰਘ ਬਾਠ ਦੀ ਅਗਵਾਈ ਹੇਠ ਇੱਕ ਵਿਸ਼ੇਸ਼ ਮੀਟਿੰਗ ਹੋਈ। ਮੀਟਿੰਗ ਵਿੱਚ ਜ਼ਿਲ੍ਹਾ ਪੱਧਰੀ ਕਮੇਟੀ ਦੇ ਮੈਂਬਰ — ਸਕੂਲ ਆਫ਼ ਐਮੀਨੈਂਸ ਖਡੂਰ ਸਾਹਿਬ ਦੇ ਪ੍ਰਿੰਸੀਪਲ ਸ. ਗੁਰਦੀਪ ਸਿੰਘ, ਸ੍ਰੀ ਗੁਰੂ ਅੰਗਦ ਦੇਵ ਬੀ.ਐੱਡ. ਕਾਲਜ ਦੀ ਪ੍ਰਿੰਸੀਪਲ ਡਾ. ਸਿਮਰਪ੍ਰੀਤ ਕੌਰ, ਜ਼ਿਲ੍ਹਾ ਗਾਈਡੈਂਸ ਕਾਊਂਸਲਰ ਸ. ਸੁਖਬੀਰ ਸਿੰਘ ਕੰਗ ਅਤੇ ਜੂਨੀਅਰ ਸਹਾਇਕ ਸ. ਤਰਸੇਮ ਸਿੰਘ — ਨੇ ਸ਼ਮੂਲੀਅਤ ਕੀਤੀ।
ਮੀਟਿੰਗ ਦੌਰਾਨ ਟੈਸਟ ਕਰਵਾਉਣ ਦੀ ਪ੍ਰਕਿਰਿਆ, ਨਿਗਰਾਨੀ, ਸਮਾਂ-ਸਾਰਣੀ ਅਤੇ ਏਜੰਸੀਆਂ ਦੀ ਚੋਣ ਸਬੰਧੀ ਵਿਸਥਾਰਪੂਰਵਕ ਵਿਚਾਰ-ਵਟਾਂਦਰਾ ਕੀਤਾ ਗਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਟੈਸਟ ਜ਼ਿਲ੍ਹਾ ਪੱਧਰੀ ਕਮੇਟੀ ਦੀ ਸਖ਼ਤ ਨਿਗਰਾਨੀ ਹੇਠ ਕਰਵਾਇਆ ਜਾਵੇਗਾ ਅਤੇ ਸਿਰਫ਼ ਉਹੀ ਰਜਿਸਟਰਡ ਏਜੰਸੀਆਂ ਇਸ ਕਾਰਜ ਲਈ ਚੁਣੀਆਂ ਜਾਣਗੀਆਂ ਜੋ ਵਿਭਾਗ ਦੀਆਂ ਸ਼ਰਤਾਂ ‘ਤੇ ਪੂਰਾ ਉਤਰਦੀਆਂ ਹਨ। ਇਸ ਸਬੰਧੀ ਯੋਗ ਏਜੰਸੀਆਂ ਨੂੰ 27 ਨਵੰਬਰ ਨੂੰ ਡੀ.ਈ.ਓ. (ਸੈਕੰਡਰੀ) ਦਫ਼ਤਰ ਤਰਨਤਾਰਨ ਵਿੱਚ ਮੀਟਿੰਗ ਲਈ ਬੁਲਾਇਆ ਗਿਆ ਹੈ।
ਡੀ.ਈ.ਓ. ਸ. ਸਤਿਨਾਮ ਸਿੰਘ ਬਾਠ ਨੇ ਦੱਸਿਆ ਕਿ ਸਾਈਕੋਮੈਟ੍ਰਿਕ ਟੈਸਟ ਵਿਗਿਆਨਕ ਤਰੀਕੇ ਨਾਲ ਤਿਆਰ ਕੀਤੇ ਜਾਂਦੇ ਮਨੋਵਿਗਿਆਨਕ ਮੁਲਾਂਕਣ ਹੁੰਦੇ ਹਨ, ਜਿਨ੍ਹਾਂ ਰਾਹੀਂ ਵਿਦਿਆਰਥੀਆਂ ਦੀ ਬੁੱਧੀ, ਵਿਅਕਤਿਤਵ, ਰੁਚੀਆਂ, ਵਿਵਹਾਰ ਤੇ ਸਮਝਣ ਦੀ ਯੋਗਤਾ ਦਾ ਅੰਦਾਜ਼ਾ ਲਗਾਇਆ ਜਾਂਦਾ ਹੈ। ਇਹ ਮੁੱਖ ਤੌਰ ‘ਤੇ ਦੋ ਕਿਸਮਾਂ ਦੇ ਹੁੰਦੇ ਹਨ:
ਐਪਟੀਟਿਊਡ ਟੈਸਟ: ਤਰਕਸ਼ੀਲ ਸੋਚ, ਗਿਣਤੀ ਸਮਰੱਥਾ, ਭਾਸ਼ਾਈ ਸਮਝ ਤੇ ਡਾਟਾ ਇੰਟਰਪ੍ਰੀਟੇਸ਼ਨ ਵਰਗੀਆਂ ਬੌਧਿਕ ਯੋਗਤਾਵਾਂ ਨੂੰ ਮਾਪਣ ਲਈ।
ਪਰਸਨੈਲਿਟੀ ਟੈਸਟ: ਵਿਵਹਾਰ, ਸੁਭਾਅ, ਟੀਮਵਰਕ, ਲੀਡਰਸ਼ਿਪ ਤੇ ਮਨੋਵਿਗਿਆਨਕ ਰੁਝਾਨ ਬਾਰੇ ਜਾਣਕਾਰੀ ਪ੍ਰਾਪਤ ਕਰਨ ਲਈ।
ਉਨ੍ਹਾਂ ਕਿਹਾ ਕਿ ਇਹ ਟੈਸਟ ਵਿਦਿਆਰਥਣਾਂ ਨੂੰ ਭਵਿੱਖ ਵਿੱਚ ਵਿਸ਼ਾ ਚੋਣ, ਕਰੀਅਰ ਦਿਸ਼ਾ ਅਤੇ ਆਪਣੀ ਯੋਗਤਾ ਪਛਾਣਣ ਵਿੱਚ ਬਹੁਤ ਮਦਦਗਾਰ ਸਾਬਤ ਹੋਣਗੇ।
ਸਿੱਖਿਆ ਵਿਭਾਗ ਨੇ ਇਹ ਅਭਿਆਨ ਵਿਦਿਆਰਥੀਆਂ ਦੇ ਸਰਵਾਂਗੀਣ ਵਿਕਾਸ ਲਈ ਇੱਕ ਵੱਡਾ ਕਦਮ ਦੱਸਿਆ ਹੈ।
