Ansari Mohalle ke qabristan jaane wale raaste par naali jaam hone se sadak par jama ganda pani, log gandagi ke beech chalne ko majboor.

Barawan |
Barawan ke Ansari Mohalle me qabristan jaane wale mukhya raaste par pichhle kai dino se naali jaam hone ke karan ilaake me gandagi aur durgandh ka mahaul bana hua hai. Naali ka ganda pani sadak par fail chuka hai, jisse logon ka aana-jaana mushkil ho gaya hai.
Sthaniya nivasiyon ka kehna hai ki is samasya ki shikayat sambandhit vibhagon aur panchayat ko kai baar di ja chuki hai, lekin ab tak koi thos karwai nahi ki gayi. Safai vyavastha par prashasan ki laparwahi saaf taur par dikh rahi hai.
Qabristan jaane ka yahi ek pramukh raasta hone ke karan janaze aur ziarat ke liye jaane walon ko bhi bhari pareshaani ka samna karna pad raha hai. Barsaat ke dino me yeh samasya aur bhi gambhir hone ka khatra bana hua hai, saath hi bimariyon ke phailne ki aashanka bhi badh gayi hai.
Mohalle ke logon ne prashasan se turant safai karwane aur naali vyavastha ko durust karne ki maang ki hai, taaki aam janta ko is pareshaani se rahat mil sake.
— Reporter: Aamir Faridi