କେନ୍ଦୁଝରଗଡ ସଦର ତହସିଲ ଅଫିସ ସମ୍ମୁଖରେ ଥିବା ଜଳଖିଆ ଦୋକାନକୁ ନେଇ ଗୁରୁତର ଅଭିଯୋଗ:- ଖାଦ୍ୟ ସୁରକ୍ଷା ଯାଞ୍ଚ ନେଇ ଉଠିଲା ପ୍ରଶ୍ନ!

କେନ୍ଦୁଝରଗଡ ସଦର ତହସିଲ ଅଫିସ ସମ୍ମୁଖରେ ଥିବା ଜଳଖିଆ ଦୋକାନକୁ ନେଇ ଗୁରୁତର ଅଭିଯୋଗ:- ଖାଦ୍ୟ ସୁରକ୍ଷା ଯାଞ୍ଚ ନେଇ ଉଠିଲା ପ୍ରଶ୍ନ!

କେନ୍ଦୁଝରଗଡ, ୩୦/୦୫ (ଖଣ୍ଡାଧାର ନିଉଜ)
ସଦର ତହସିଲ ଅଫିସ ସମ୍ମୁଖରେ ଥିବା ଏକ ଟିଫିନ ଦୋକାନକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଓ ଅସନ୍ତୋଷ ଦେଖାଦେଇଛି। ଦୋକାନୀଙ୍କ ବିରୋଧରେ ଖାଦ୍ୟର ମାନ ଓ ସ୍ୱଚ୍ଛତାକୁ ନେଇ ଅନେକ ଗୁରୁତର ଅଭିଯୋଗ ସାମ୍ନାକୁ ଆସିଛି। ତେବେ ଏହି ସମସ୍ତ ଅଭିଯୋଗର ସରକାରୀ ଯାଞ୍ଚ ହୋଇନଥିବାରୁ ଏଗୁଡ଼ିକୁ ଅଭିଯୋଗ ଭାବରେ ହିଁ ଦେଖାଯାଉଛି।
ଅଭିଯୋଗ ଅନୁସାରେ, ଦୋକାନୀ କିଛି ଗରିବ ଲୋକଙ୍କଠାରୁ ସରକାରଙ୍କ ମାଗଣା ଚାଉଳ କମ ଦାମରେ କିଣି ବ୍ୟବସାୟିକ କାର୍ଯ୍ୟରେ ବ୍ୟବହାର କରୁଥିବା କଥା କୁହାଯାଉଛି। ସେହି ଚାଉଳରେ ଦୋସା, ବରା, ଆଳୁଚପ ଆଦି ଖାଦ୍ୟ ପ୍ରସ୍ତୁତ କରାଯାଉଥିବା ଅଭିଯୋଗ ମଧ୍ୟ ହୋଇଛି। ସେହିପରି ଖାଦ୍ୟ ପ୍ରସ୍ତୁତିରେ ନିମ୍ନମାନର ସାମଗ୍ରୀ ବ୍ୟବହାର, ଅସ୍ୱଚ୍ଛ ପରିବେଶରେ ରୋଷେଇ, ଏବଂ ଦୀର୍ଘଦିନ ଧରି ସଫା ନ ହୋଇଥିବା ପାଣି ଟାଙ୍କିର ପାଣି ବ୍ୟବହାର କରାଯାଉଥିବା ଭଳି ଅଭିଯୋଗ ମଧ୍ୟ ଉଠିଛି। କେତେକ ଗ୍ରାହକଙ୍କ ଦାବି ଅନୁଯାୟୀ, ଖାଦ୍ୟରେ ମାଛି ଓ ଅନ୍ୟାନ୍ୟ ଅପରିଷ୍କାର ବସ୍ତୁ ମିଳିଥିବା ଘଟଣା ମଧ୍ୟ ଘଟିଛି।
ସ୍ଥାନୀୟ ଲୋକଙ୍କ କହିବା ଅନୁସାରେ, ଏପରି ଖାଦ୍ୟ ଖାଇଲେ ଜନସ୍ୱାସ୍ଥ୍ୟ ଉପରେ କୁପ୍ରଭାବ ପଡ଼ିପାରେ। ଏହାକୁ ନେଇ ଅନେକ ଲୋକ ଖାଦ୍ୟ ସୁରକ୍ଷା ବିଭାଗର ତୁରନ୍ତ ହସ୍ତକ୍ଷେପ ଦାବି କରିଛନ୍ତି। ଅନ୍ୟପଟେ, ଦୋକାନୀଙ୍କ ପକ୍ଷରୁ କେତେକ ଅଭିଯୋଗକୁ ଅସ୍ୱୀକାର କରାଯାଇଥିବା ବେଳେ, କୌଣସି ତ୍ରୁଟି ଥିଲେ ତାହା ଅନିଚ୍ଛାକୃତ ଭାବେ ଘଟିଥିବା କଥା କୁହାଯାଇଛି। ଏହି ଘଟଣା ପରେ ସ୍ଥାନୀୟ ଲୋକମାନେ ଖାଦ୍ୟ ସୁରକ୍ଷା ଓ ମାନ ନିର୍ଣ୍ଣୟ ବିଭାଗ (Food Safety Department) ପକ୍ଷରୁ ତୁରନ୍ତ ଯାଞ୍ଚ କରିବା ସହ ଆବଶ୍ୟକ ପଦକ୍ଷେପ ନେବାକୁ ଦାବି କରିଛନ୍ତି। ଯଦି ଅଭିଯୋଗଗୁଡ଼ିକ ସତ୍ୟ ପ୍ରମାଣିତ ହୁଏ, ତେବେ ଆଇନ ଅନୁଯାୟୀ କଡ଼ା କାର୍ଯ୍ୟାନୁଷ୍ଠାନ ହୋଇପାରେ। (କମଳଲୋଚନ ମହାନ୍ତ ଙ୍କ ରିପୋର୍ଟ)

(ବି.ଦ୍ର: ଏହି ରିପୋର୍ଟରେ ଉଲ୍ଲେଖିତ ସମସ୍ତ ବିଷୟ ଅଭିଯୋଗ ଆଧାରିତ। ସମ୍ପୃକ୍ତ ବିଭାଗର ଯାଞ୍ଚ ଓ ରିପୋର୍ଟ ପରେ ପ୍ରକୃତ ସତ୍ୟତା ସ୍ପଷ୍ଟ ହେବ)