📰 देऊळवाडीला जल स्वराज्य प्रकल्पाचे प्रमाणपत्र – पण विहीर व पाण्याची टाकी गायब, ग्रामस्थांचा संताप

Prakash Madhukar Kendre, Latur, Maharashtra (MH)
04/10/2025 01:00 PM

📰 देऊळवाडीला जल स्वराज्य प्रकल्पाचे प्रमाणपत्र – पण विहीर व पाण्याची टाकी गायब, ग्रामस्थांचा संताप!
देऊळवाडी (ता.उदगीर– ‘आदर्श गाव’ म्हणून प्रसिद्ध असलेल्या देऊळवाडी ग्रामपंचायतीला जल स्वराज्य प्रकल्पाचे प्रमाणपत्र देण्यात आले असून ग्रामपंचायतीच्या भिंतीवर ते अभिमानाने लावण्यात आले आहे. मात्र, आश्चर्य म्हणजे या प्रकल्पांतर्गत उभारण्यात आलेली विहीर आणि पाण्याची टाकी ठिकाणावरून गायब झाल्याने ग्रामस्थांमध्ये तीव्र नाराजी व्यक्त होत आहे.
गावातील नागरिकांच्या म्हणण्यानुसार, जल स्वराज्य योजनेतून गावासाठी विहीर बांधण्यात आली होती आणि पाण्याची टाकीही उभारण्यात आली होती. मात्र, सध्या त्या दोन्ही ठिकाणी कोणतेही काम अस्तित्वात नसल्याचे स्पष्ट झाले आहे. “प्रकल्पाचे प्रमाणपत्र मात्र लावले आहे, पण प्रत्यक्षात पाणीपुरवठ्याची साधनेच नाहीत. मग निधी गेला कुठे आणि काम झाले कुठे?” असा संतप्त सवाल ग्रामस्थांनी केला आहे.
काही ग्रामस्थांचा आरोप आहे की, प्रकल्पासाठी आलेली साधने काही अधिकाऱ्यांनी चोरी करून नेली असावीत, कारण ठिकाणी काहीच उरलेले नाही. “गावात पाणीटंचाई कायम आहे. अशा परिस्थितीत सरकारकडून आलेल्या योजनांचा लाभ मिळावा अशी अपेक्षा होती. पण आता तीच साधनेच नाहीत तर हा प्रकल्प फक्त कागदावरच राबवला का?” असा प्रश्न ग्रामस्थ विचारत आहेत.
आज ग्रामपंचायतीत काही कारणास्तव गेलेल्या नागरिकांनी जल स्वराज्य प्रकल्पाचे प्रमाणपत्र भिंतीवर लावलेले पाहिले, पण विहीर आणि पाण्याची टाकी मात्र कुठेच आढळली नाही. त्यामुळे ग्रामस्थांनी तात्काळ तपास करून जबाबदारांवर कठोर कारवाईची मागणी केली आहे.

1485 views